DECLARACIÓN POL DÍA D’ASTURIES 2024

 

Dende equí xuntámonos a cuantes voces d’asturianes y asturianos sienten y canten a la nuesa PATRIA QUERÍA y facemos un llamau a que, per riba de les diferencies y les emociones, faigamos un exerciciu de discutiniu alrodiu del presente del nuestru país enfotaos pel so futuru y el de les nueves xeneraciones. Por eso, la nuesa cellebración de feches señalaes como el 8-S o el 25-M tien que ser reivindicativa per tou lo que queda por facer, en sin cayer en quexes xeremíaques inútiles, poro llamando a les coses que non mos presten pel so nome.

Esmolecémonos pol nuestru PATRIMONIU IDENTITARIU, que ye’l que mos fai singulares ya universales frente a les fuercies culturales homoxeneizadores. Ente toles manifestaciones del mesmu, les nueses llingües vernácules y el so plenu reconocimientu constitucional ya estatutariu ocupen un llugar cimeru ya inxustamente arrequexau. Arrenunciar a la so cooficialidá, arriendes d’ una afrenta, ye negar la esencia de lo que mos fai lo que somos.

Non naguamos per ser más que naide y refugamos tou supremacismu o esclusivismu, poro menos entovía vamos a siguir soportando ser menos, en bona midía, pola renuncia acomplexada de les nueses élites históriques. LA NUNCA VENCÍA llámamos dende les sos coraes históriques a pensamos otra vegá y poner pies en parea a los que mos corten les ales del presente y del futuru. Somos un pueblu pequeñu, pero ficimos y sabemos facer coses grandes.

Por eso naguamos pel AUTOGOBIERNU PLENU, al que los nuesos cabezaleros renunciaren en 1980, pa ser quien a algamar el másimu techu competencial y la financiación afayaiza. Facémoslo basándomos en los probes resultaos del estatus onde mos dexaren y en la encruciyada constitucional y territorial que ta viéndose n’España nesti momento.

La fondura les tresformaciones socioeconómiques y culturales del procesu de globalización, l’avance de la integración europea y les propies mutaciones de la estructura territorial española y el so impautu n’Asturies sofiten la necesidá de reforzar los resortes y el control de les nueses decisiones nun ESPACIU XEOPOLÍTICU Y ECONÓMICU ATLÁNTICU, que tien ADN históricu asturianu.

SOMOS ASTURIES a tolos efeutos sociales, económicos, culturales, políticos ya institucionales y tamos enfotaos n’afitar l’arguyu de ser asturianos de plenu derechu.

Por tou ello, glayamos bien altu:

 

¡PUXA ASTURIES, LA NUESA PATRIA QUERÍA!

---

versión eonaviego

DECLARACIÓN POL DÍA D’ASTURIAS 2024

 

Dende aquí xuntámonos a cuantas voces d’asturianas y asturianos sinten y cantan á nosa PATRIA QUERÍDA y femos un chamo a que, porriba das diferencias y as emocióis, fágamos un exercicio de discusión alredor del presente del noso país asegurando el sou futuro y el das novas xeneracióis. Por eso, a nosa celebración de fechas señaladas como el 8-S ou el 25-M ten que ser reivindicativa por todo lo que queda por fer, sin cayer en queixas xeremíaques inútiles, peró chamando ás cousas que nun nos prestan pol sou nome.

Esmolecémonos pol noso PATRIMONIO IDENTITARIO, que é el que nos fai singulares y universales frente as forzas culturales homoxeneizadoras. Ente todas as manifestacióis del mesmo, as nosas linguas vernáculas y el sou pleno reconocimento constitucional y estatutario deben ocupar un lugar enriba da mesa. Renunciar á cooficialidá, por medo d’úa afrenta, é negar a esencia de lo que nos fai lo que somos.

Non queremos ser máis que naide y nun queremos supremacismo ou esclusivismo, peró inda menos vamos a siguir soportando ser menos, en búa midida, pola renuncia acomplexada das élites históricas. A NUNCA VENCÍDA chamamos dende as súas coradas históricas pensamos d’outra vez poner pés en pared a os que nos cortan as alas del presente y del futuro. Somos un poblo pequeno, peró fixemos y sabemos fer cousas grandes.

Por eso temos ganas de ter un AUTOGOBERNO PLENO, al que os nosos choqueiros renunciaron en 1980, pa ser quen a axuntar el máximo techo competencial y a financiación necesaria. Facémoslo basándonos nos probes resultaos del estatus unde nos deixaron y nel cruceiro constitucional y territorial que ta víndose en Españan este momento.

 

A fondura das tresformacióis socioeconómicas y culturales del proceso de globalización, el avance da integración europea y as propias mutacióis da estructura territorial española y el sou impacto en Asturias, mantein a necesidá de reforzaros resortes y el control das nosas decisióis nun ESPACIO XEOPOLÍTICO Y ECONÓMICO ATLÁNTICO, que ten ADN histórico asturiano.

SOMOS ASTURIAS a todos efectos sociales, económicos, culturales, políticos y institucionales y tamos esfoutaos en apoyar el orguyo de ser asturianos de pleno dereto.

Por todo elo, berramos ben alto:

 

 

¡PUXA ASTURIAS, A NOSA PATRIA QUERÍDA!